Selamat datang di blog ini, disini anda bebas meberikan kritik maupun saran,Terima kasih atas kunjungan anda

Senin, 13 September 2010

Palui Keguguran

Salawas batianan anum ini bini Palui panimburuan banar. Apalagi wayah Palui katahuan ada main wan acil Irus. Kamana-mana Palui musti dicurigai, sampai kada kawa bagarak matan rumah. Pabila bulik kantur talambat sadikit haja, muha bininya langsung berot. Apalagi bila sampai ta-ka malam, bisa talu hari sariknya haja.

Hanyar tadi Palui disaru acil Irus basalamatan mahaul arwah lakinya. Undangan diantarakan langsung ka rumah Palui, kabalujuran nang manarima bininya. Surat undangan itu langsung disimpaninya, supaya Palui kada mambaca wan kada baniat tulak saruan. Tapi rupanya Palui tatamu wan Garbus wayah sembayang ashar di masigit.

“Uiiii….. Lui, adalah ikam manarima undangan acil Irus, malam ini sidin basalamatan?” ujar Garbus.

“Kadada Bus ai. Pasti undangan basaruan itu disampaiakan ka rumah, maka binikulah nang manarimanya. Bila inya nang manarima musti disimpaninya, kada dipadahakannya wan aku,” ujar Palui.


“Tapi……… walaupun aku kada manarima undangannya, malam ini aku tulak jua,” ujar Palui pulang.

Malamnya Palui mamikirakan nangkaya apa caranya sakira inya kawa kaluar rumah. Imbah tuhuk mamikirakan Lalu inya dapat akal lalu bapadah wan bininya handak ka rumah Pambakal, ada urusan panting. Imbah bahahadangan sampai batangah jam hanyar takumpulan, lalu tulakan baimbai ka rumah acil Irus.

“Bubuhan ikam ini bisa banar maatur waktu, wayah urang tuntung mambaca doa dan handak basusurung hanyar datangan. Makanya tugas bubuhan ikam kaina umpat basisimpun dan langsung babasuh piring” ujar katua RT manyindir.

“Kalu di rumah acil Irus ini jangankan babasuh piring, bamalampun kami kada kabaratan” sahut Palui maangsul.

“Ayu silakan makanan, makan saadanya,” ujar tuan rumah mamarinanya acil Irus.

karna bubuhannya datang talambat maka tapaksa dudukan parak lawang haja.

“Aku katuju haja parak lawang nyaman mambelokkakan ka higa,” ujar Palui sambil manyintak dua talu piring iwaknya.

“Uma ai lakasnya ikam makan Lui, sudah dua talu piring iwak hayamnya habis” ujar Garbus.

“Aku tapakai ilmu Tulamak, banyak makan iwak pada nasi” ujar Palui manyirit Tulamak.

“Aku hakun haja diburukakan asal nang dimakan jadi awak kawa lamak kaya aku, kada kaya Palui makan gancang tapi tatap kurus karing, napa bainguan naga dalam parut,” sahut Tulamak mambalas.

IMBAH tuntung makanan lalu bubuhannya bulikan. Wayah turun tangga karna kadap rupanya si Palui tajarungkup ka tanah. Bubuhannya galu malihat Palui tahantak, apalagi imbah malihat matan tapih Palui kaluaran darah habang.


“Palui…….. Palui kaguguran, Palui kaguguran darahnya kaluaran tarus,” ujar Garbus wan Tulamak sambil maangkat Palui dan mambuka tapihnya nang mahabang.

“Jangan galu, jangan ribut. Nang batianan itu adalah biniku lain aku. Mustahil aku lalakian bisa kaguguran,” ujar Palui sarik.

“Darahnya babau, babau ganyir, pina baminyak dan ada lumbuknya,” ujar Tulamak mulai curiga.

“Astaga……. rupanya ikam mambarakat iwak hayam dalam tapih!” ujar Garbus langsung mahuhulut Palui karna katahuan kabiasaan buruknya bila saruan. (Copyright © B.Post)

Tidak ada komentar:

Posting Komentar